سؤال الكل بيسأله وتعالوا نجاوب عنه بالتفصيل.
زى ما أتفقنا من قبل كده وعرفنا ان الشيا باتر بطبعيتها تقيله وناشفه شويه فى درجه الحراره العاديه ولما تبقى فى التلاجه هتبقى hard أكتر طبعا وده بيصعب أستخدامها شويه بالذات للبنات المتعودين على استخدام الكريمات التجاريه اللى بتبقى سوفت جدا وناعمه. طيب ايه الحل؟
الشيا باتر ممكن تستخدميها بأربع أشكال مختلفه:
--------------------------
1. تستخدميها زى ما هى كده علطول بإنك تاخدى حته صوغنتوته منها وتحطيها فى كف ايدك وتدلكيها بسيط وهتلاقيها ساحت وأتحولت لزيت تقدرى تحطيه على بشرتك أو شعرك.
* مميزات الطريقه ديه:
- أنك بتاخدى جرعه مكثفه وعاليه من الشيا وبالتالى كل الفيتامينات والفوائد اللى فيها .
- بتحصلى على نتيجه أسرع فى الغرض اللى بتستخدميها علشانه سيان كان ترطيب و تفتيح او استرتش ماركس او تجاعيد او ........
* عيوب الطريقه ديه:
- الشيا بتخلص أسرع طبعا :)
- بتحتاج وقت فى تطبيقها لأنك كل مره هتاخدى شويه وتسيحيهم فى ايدك وتحطيهم على بشرتك او شعرك.
* تجارب فى استخدام الطريقه ديه:
هايله لمنطقه حول العين وتجاعيد ما حول العين والفم - هايله فى الشعر بعد الأستحمام كأنه مكوى.
--------------------------
2. الطريقه التانيه بإنك تاخدى الكميه اللى متوقعه انك تستخدميها كل مره وتعمليلها حمام ماء وعند اقل درجه حراره ممكنه (علشان تحافظى على الفيتامينات اللى فيها واللى بتبوظ بدرجات الحراره المرتفعه) وتقلبيها لحد ما تسيح تماما وتتحول لزيت وساعتها تدهنيها على بشرتك أو شعرك.
* المميزات:
نفس مميزات الطريقه السابقه ويضاف ليها سهول الأستعمال لأنها هتبقى زيت.
*العيوب:
بتاخد وقت وتحضير كل مره أستخدام - وبرده الشيا هتخلص اسرع :)
--------------------------
3. الطريقه التالته بإنك تاخدى كميه من الشيا باتر اللى عندك وتضيفى معاهم كميه من أى زيت طبيعى مفيد تحبيه زى زيت الزيتون - زيت السمسم - زيت جوز الهند - زيت اللوز. كل زيت ليه فوايده فشوفى انتى حابه مين فيهم وخدى منه كميه تعادل كميه الشيا او أقل أو أكتر على حسب تفضيلاتك انتى وحطيهم مع الشيا فى نفس الوعاء و تعمللهم حمام ماء دافى عند اقل درجه حراره ممكنه وتقلبى لحد ما يمتزجوا تماما وتسبيهم يبردوا تماما مع التقليب كل فتره علشان المكونات متنفصلش تانى وتسبيها فتره هتلاقيها تقلت وتحولت لباتر تانى بس أخف وأنعم بكتير.
طبعا كل ما هتزودى نسبه الزيت المنتج النهائى هيبقى سوفت اكتر والعكس.
* المميزات:
- هتستخدمى كميه أقل من الشيا
- هتستفيدى بالفوائد الموجوده فى الزيت اللى هتحطيه
- المنتج النهائى انعم بكتير وسهل الأستخدام فى اى وقت
* العيوب:
- نسبه الشيا أقل فبالتالى فايده أقل من أستخدامها كخام مباشره.
--------------------------
4. الطريقه الرابعه أسمها الوايبد شيا باتر whipped Shea butter
وديه بتم بإنك تحطى الكميه اللى انتى عاوزاها من الشيا فى وعاء وتضيفى عليه كميه من اى زيت تحبيه وبالنسبه اللى ترتاحى ليها ويستحسن متزدش عن نسبه 1:1 يعنى كل كميه شيا قصادها نفس الكميه من الزيت . وبعدين تجيبى الميكسر او مضرب البيض وتفضلى تضربى فيها ييجى 5 دقايق كده لحد ما هتلاقيها أتحولت للشكل الكريمى اللذيذ زى اللى فى الصوره ده :)
* المميزات:
نفس مميزات الطريق السابقه مع إضافه ان مفيش عمليه تسخين حصلت وده أفضل.
* العيوب :
نفس عيوب الطريقه السابقه
--------------------------
ملحوظات:
- الشيا باتر بتذوب فى درجه حراره الجسم العاديه . يعنى لما بتلمس الجلد لفتره بتلاقيها بتدوب لوحدها بسهوله وببطىء فى نفس الوقت ده العادى بتاعها.
- وانتى بتعملى حمام ماء مينفعش بإى حال من الأحول تزودى درجه الحراره عن 80 انتى كده بتقضى على اغلب الفيتامينات والفوايد اللى فى الشيا ومش هتلاقى نتيجه فى استخدامها واوعى تحطيها على النار مباشره او فى الميكرويف او الفرن.
- أحرصى كل الحرص طول ما انتى بتشتغلى فى تحضير الشيا او بتستخدميها ان تبقى كل حاجه حواليكى جافه وميجيش عليها نقطه ميه والا كده بتعرضيها للتلف السريع.
ليست هناك تعليقات:
إرسال تعليق