-- الشيا باتر الخام الطبيعيه ال unrefined رائحتها قويه وطبيعيه, بمعنى تتوقعيها زى رائحه الزيوت والحاجات الطبيعيه اللى بتجبيها من العطاره. متتوقعهاش زى رائحه الكريمات اللى بيبقى مضاف ليها عطور.
وزى ما كل الناس بره بتوصف رائحتها انها
nutty, smoky, earthy
حاجه كده قريبه من رائحه زيت الزيتون على خفيف على رائحه تدخين بسيطه على رائحه الحبوب والأرض .. بصوا هى بصراحه صعب اوى ان اوصف رائحتها :)
ممكن اول ما تشميها تستغربى منها لكن بعد ما تتعودى عليها هتحبيها زى ما أنا حبتها. عارفه ليه؟
علشان الريحه ديه هتبقى بتمثل ليكى الجمال, خير الطبيعه, الصفاء, البشره الحلوه والشعر الناعم :)
هتبقى بتمثل ليكى حاجه حلوه فهتقعى فى حبها وهتشتاقى تشمى ريحتها :)
والأجمل ان رائحتها بعد ما تدهنيها على جلدك او شعرك بتقعد يا دوب ربع ساعه وتختفى تماما وميبقاش فيه رائحه قويه او نفاذه على الإطلاق.
-- قوامها بقى فى الظروف الجويه العاديه ودرجه حراره معتدله بيبقى متماسك وكل ما الجو بقى أبرد اكتر بيبقى متماسك اكتر والعكس طبعا.
بس الجميل فيها انها بتدوب عند درجه حراره جسمك :)
يعنى اول ما تحطى حته منها فى كف ايدك وتبدأى تدلكيها بسيط هتلاقيها بدأت تدوب وتتحول لزيت وتدهنيها بكل سهوله بشكلها الخام .
الأجمل ان كميه بسيطه منها كافيه لدهان مساحه كبيره من بشرتك. ويكفى انك تدهنى طبقه رقيقه جدا منها مش محتاجه اكتر من كده. ويا دوبك 10 دقائق أو أقل هتلاقى بشرتك شربتها بمنتهى السهوله وأعطتك ملمس جميل ولون ومظهر مشرق لبشرتك. وديه من أهم الصفات المميزه للشيا باتر وهى سهوله أمتصاصها من قبل البشره.
ليست هناك تعليقات:
إرسال تعليق