تمارين يوميه سريعه جدا

ديه مجموعه أفكار لتمارين سريعه جدا مبتاخدش وقت خالص وفى نفس الوقت فايدتها عاليه جدا وهتخليكى تمارسى رياضه يوميا بدون مجهود كبير ولا وقت كبير.

هتقوى عضلاتك وتحسن الدوره الدمويه فى جسمك وهتحسسك بالدفىء والنشاط + هتحسن حالتك النفسيه وتديكى طاقه عاليه :)
وده هينعكس طبعا على شكل جسمك وتناسقه.

تقدرى تمارسى تمرين واحد فقط منهم او تمارسيهم كلهم او تختارى اللى يعجبك وتواظبى عليه.

1. تمرين النط فى المكان



أيوه اتنططى ديه حاجه حلوه جدا :)
حتى لو صعبه فى الأول مع الوقت هتتعودى عليها ومش لازم بحبل.
حطى لنفسك خطه كامله أنك كل يوم هتنطى 100 نطه وتقسميهم على 20 فى كل مره. ممكن مثلا تربطيهم بميعاد الصلاه, وبعد كل صلاه نطى 20 مره ورا بعض وهكذا.
التمرين ده رغم بساطته وقله وقته لكن فوايده كتير جدا للقلب وللدوره الدمويه وللحاله النفسيه والأهم لتقويه العضلات وزياده كثافه العظام ومنع حدوث هشاشه العظام للسيدات. ولو واظبتى عليه لمده اسابيع بسيطه هيعمل على زياده كثافه عظام الوركين والحوض ودول اكتر منطقه بتتعرض للكسر عند السيدات مع التقدم فى العمر.
يبقى يلا كل واحده فينا ايا كان سنها ووزنها وعمرها تقوم تنط نطه.
وخديها قاعده: النط أسلوب حياه من الأن فصاعدا :)


2. تمرين الجرى فى المكان

هو اصعب شويه من النط فى المكان بس لو عرفتى انك بس مطلوب منك تجرى فى مكانك لمده دقيقه واحده يوميا مش هيبقى صعب خالص. دقيقه واحده لحد ما تتعودى وبعدين تزودي دقيقه كمان وهكذا ولحد ما توصلى ل 5 دقائق وانتى مرتاحه جدا.
بكده تكونى دربتى جسمك كويس اوى وجريتى الدوره الدمويه وعضله القلب وعضلات الأرجل والبطن والأرداف والأيدين. يعنى فايده من كل اتجاه.


3. تمرين المشى لمده ربع ساعه الى نص ساعه


ومتقوليش امشى فين او معنديش مشايه. انتى تقدرى تمشى فى المكان او تمشى فى البيت فى الصاله وبين الغرف بس بشكل متواصل ولمده ربع ساعه على الأقل مبدأيا وتزيد لحد ما توصل نص ساعه يوميا.
بالأضافه لفوائد المشى المعروفه جدا الا انه من اكتر التمارين اللى بتساعدك على التأمل والأسترخاء وبتفضى دماغك وتديكى طاقه نفسيه عاليه.


4. تمرين التنفس الصحيح



التمرين ده رغم بساطته الا انه بيساعد على دخول كميه كبيره من الأكسجين لجسمك وبالتالى حرق افضل وطاقه افضل. يعنى من النهارده هتخسى كل ما تتنفسى :)
التنفس العميق والسليم بيكون عن طريق انك تاخدى نفس عميق جدا وتملى بيه صدرك لدرجه تضغط على الحجاب الحاجز اللى بين الصدر والبطن وتخليه ينزل لتحت وبالتالى البطن تطلع لبره (لأن فى ناس كتير للأسف لما تستنشق بتشفط بطنها وده غلط وبيقلل حجم الهواء اللى داخل للرئتين) . أنظرى الصوره للتوضيح.
أحبسى الهواء جوه الرئتين لمده خمس ثوانى.
خرجى الهواء من الفم ببطىء لمده خمس ثوانى لحد ما بطنك تتشفط خالص (عكس الشهيق)
كررى الموضوع ده 15 مره فى اليوم ولو حبيتى تعملى اكتر من كده يبقى على جلستين مختلفتين كل واحده فيهم 15 مره.





ليست هناك تعليقات:

إرسال تعليق