أسمعى لنداءات جسمك وأفهميها

حطى الكام سطر دول حلقه فى ودنك:

- جسمك عارف هو عاوز ايه

- جسمك عارف ايه اللى محتاجه فهيمتصه وايه اللى مش محتاجه فهيطرحه فى الفضلات

- جسمك بيعرف أمته هو جعان فعلا فبينبهك علشان تأكليه

- جسمك بيوحيلك تختارى تاكلى ايه علشان هو ده اللى هو محتاجه من عناصر غذائيه

- جسمك بيعرف أمته هو أستكفى من العناصر المختلفه وبينبهك علشان تبطلى أكل

- جسمك بيعرف أمته هو محتاج ميه فبينبهك علشان تشربى

- جسمك عارف اذا كنتى عايزه تخسى ولا عايزه تتخنى وبينفذ حرفيا اللى بتفكرى فيه

- جسمك ذكى جدا جدا أكثر مما تتخيلى والذكاء ده أودعه فيه الخالق سبحانه للحفاظ على الحياه وعليكى فى كيانك المادى المحسوس.

أزاى جسمك بينبهك لما يكون جعان؟

علامات الجوع الحقيقى وحطى مليون خط تحت كلمه الحقيقى ديه هى ان عصافير بطنك تصوصو بجد :)
أوعى أوعى تاكلى الا لما تحسى ان عصافير بطنك بدأت فى الصوصوه. 

أى شعور بالجوع قبل كده هو شعور كاذب تماما مصدره عاطفى بحت مش بسبب انك جعانه حقيقى فاتعلمى تتجاهليه تماما وتشغلى نفسك بحاجه تانيه ساعتها. أقرى كتاب - اتنططى - قومى ارقصى - اشتغلى فى البيت - كلمى صاحبتك. المهم اتصرفى ومتاكليش :)

بس خلى بالك تصوصو بس مش تصوت. يعنى متوصليش نفسك لدرجه جوع لا تحتمل. لا بس انتى تحسى ان بطنك بتوجعك وانك جعانه فعلا ده كافى والا هيتقلب العكس ومش هتعرفى تتحكمى فى شهيتك والدنيا هتضرب منك.

أزاى جسمك بيوحيلك تختارى تاكلى ايه؟

زى ما اتفقنا بعد ما عصافير بطنك تبتدى تصوص ومش قبل كده. أفتحى التلاجه وخدى جوله سريعه واللى تشتهيه نفسك فى اللحظه ديه كليه. 

بجد!!!!!
أيوه والله بجد .. متحرميش نفسك الحرمان وحش هههههه

أزاى جسمك بيقولك كفايه بطلى أكل؟

بعد ما طلعتى الطبق وهاتك هم المم مطلوب منك 3 حاجات:

أولا : كلى برواقه وانتى قاعده وهاديه ومستمتعه بكل لقمه بتاكليها وفرحانه وشاكره لنعمه ربنا على اللقمه والأكل الجميل والصحه والعافيه :)
سمى وأحمدى وأمتنى لكل نقطه مطر سقت الزرعه اللى اتحولت لأكل بتاكليه وانتى قاعده مستريحه, لكل اللى ضرب الأرض بفاس واللى جمع وحصد واللى شال على دراعه واللى ساق ووصل واللى باع واشترى وللى طبخ وللى صنع :)
مشوار طويل اوى ونعمه كبيره اوى .. تفرح من القلب فعلا. الدنيا بخير والكون كله خير والحياه خير كتير من خالقها.

ملحوظه: متاكليش ادام التلفزيون او النت او اى حاجه تخلى دماغك وتفكيرك مشغول بحاجه غير اللى بتاكليها. ركزى فى الأكل اللى بتاكليه لو سمحت :)

ثانيا: أمضغى كويس اوى واستمتعى بكل مذاق من كل فتفوته على كل حته فى لسانك :)

ثالثا: بعد كل لقمه او لقمتين أسمعى لجسمك وحسىبيه. هل شبع؟ بطنك شبعت؟ حاسه بالأكل فيها؟ خلاص معدتش بتصوصو؟ لو كده يبقى وقفى أكل او لو طمعتى فى لقمتين زياده خديهم بس مش اكتر من كده :)
مدبيهاش بقى ههههه

أول ما تحسى ان إحساسك الفعلى بالجوع راح وعصافير بطنك أكلت وسكتت ومبتصوصوش يبقى ده مؤشر جسمك بيقولك بيه انا استكفيت على كده وأى زياده ديه بسبب جوع عاطفى نفسى مش حقيقى وبالتالى لازم توقفى اكل وتحمدى ربنا وتروحى تشغلى نفسك بأى حاجه مفيده مفرحه تعمليها.

أزاى جسمك بيقولك أنه عطشان؟

سمعاه عطشاااااااان مش جعان. لأن كتير اوى مننا ونتيجه اننا مبقناش نسمع لجسمنا ونفهمه بيفتكر ان احساس العطش جوع !!!!

وبدل ما يروح يشرب بيروح ياكل وطبعا الأكل مبيطفيش احساس العطش فبيفضل ياكل وديه كارثه.

أمال أيه الحل؟
الحل وعلشان تبقى فى السليم اول ما تشكى انك جعانه او عطشانه روحى اشربى الأول كوبيتين ميه حلوين كده. لو عطشانه هيبقى ده كافى جدا وتمام. لو جعانه هتعرفى ساعتها من العصافير وهتاكلى :)

جسمك عارف اذا كنتى عايزه تخسى ولا عايزه تتخنى!!

أيه بقى الكلام الغريب ده!! ما انا طبعا عايزه اخس هى ديه فيها كلام!!!

تصدقى أه فيها كلام!! أنتى بتقولى انتى عايزه تخسى بلسانك لكن هل قلتيها فعلا بمشاعرك وأفكارك؟

يعنى ايه وأزاى؟

هقولك. تقوليها بأفكارك بمعنى أنك تشوفى نفسك فى الوزن والصوره اللى بتحلمى بيها. الصوره ديه منطبعه فى دماغك وشيفاه وهى صورتك عن نفسك. مشاعرك ناحيه نفسك وشكلك مشاعر محبه ومتقبله ومتحمسه للصوره الرائعه اللى انتى رساماها فى ذهنك وواثقه انها انتى.

اللى بيحصل انك بتبقى كارهه صورتك الحاليه ويمكن كمان محتقراها وصورتك الذهنيه عن نفسك سيئه وبتحطى دايما من قدرها فبالله عليكى عايز جسمك يتغير ازاى وانتى طول الوقت محسساه انك بتكرهيه وانه وحش وانك مش راضيه عنه؟ طبعا هيعند معكى. انتى شيفانى وحش وضارب ومش متناسق؟ يعنى انتى شيفانى كده؟ طيب انا فعلا كده وهفضل كده؟ ومش هتغير غير لو رضيتى عنى وشوفتينى على حقيقتى جميل ومتناسق وصحى.

أكيد انتى مستغربه من الكلام ده. بس صدقينى ده فعلا اللى بيحصل. واديكى جربتى كتير وأن اوان التغيير وانك تجربى حاجه جديده بمشاعر حلوه وراقيه وسلام داخلى وتشوفى انعكاس ده مش بس على جسمك لا على كل حياتك وعلى حبك وثقتك فى نفسك.

طيب اعمل كده أزاى؟ أطبع الصوره المثاليه عن جسمى فى عقلى وأفكارى كده ازاى؟

فى طريقه سهله أوى ومجربه ونتيجتها هايله. وهى انك تجيبى صوره قديمه ليكى وزنك كان فيها مظبوط وشكلك فيها تمام وتعلقيها فى مكان بتشوفيه كل يوم على الأقل مره واحده. ولما تشوفيها تبتسمى لنفسك من جوه وتقولى انا ديه وده شكلى الحقيقى. وخلى أفكارك عن نفسك كلها إيجابى ومحفز واى فكره سلبيه غيريها فورا ومتنساقيش وراها. خلى طاقتك علطول عاليه وخليكى فرحانه. لو فضلتى كده اوعدك انك هتعرفى تتحكمى فى جسمك واكلك وكل حياتك :)

لو معندكيش صوره كده. هاتى اى صوره من على النت وركبى عليها راسك وعيشى الدور :)

------------------------------------------------

أخيرا عيشى بحب وأمتنان لكل جميل فى الحياه وعودى نفسك على انك تشوفى الحلو فى كل حاجه حواليكى. وعودى نفسك انك تمتنى لكل حاجه حواليكى من اول الأروض والسجاد اللى انتى ماشيه عاليه والملابس اللى مدفياكى والغساله اللى بتغسل هدومك والبوتاجاز اللى بيسوى والتلاجه اللى بتسقع والطبق اللى بتاكلى فيها والأكل نفسه ولكل حاجه حلوه ومشاعر حلوه صادقه فى حياتك.
أشكرى كتيييررر اوى وامتنى كتيييير اوى وانتى هتلاقى معجزات بتتحقق مكنتيش تتخيليها.

"وإن شكرتم لأزيدنكم" وعد من رب الكون :)

تدريب سريع وفعال فى الأمتنان:

- كل يوم الصبح اقعدى مع نفسك سريعا وأمتنى لعشر حاجات او اشخاص او مشاعر فى حياتك. وكل يوم حاولى تمتنى لعشره جداد ولو قدرتى تكتبيهم وانتى بتفكرى ليه ممتنه ليهم يبقى افضل.
- كل يوم قبل ما تنامى فكرى فى احلى حاجه حصلتلك النهارده فى يومك وامتنى ليها واشكرى ونامى وانتى على وجهك ابتسامه جميله وتصبحى على خير :)